Sans atente de guerredon (42)
Sans atente de guerredon (42)
Sans atente de guerredon
M’otroi à ma Dame servir.
Puis que toute s’entention
Est si tornée en moi haïr,
Qu’elle m’ocist à desraison,
Ja Deus mès ne me doinst joïr
De riens, fors que de tost morir!
Car autrement ne puet faillir
Mors, dont el seit l’ocheson.
Grant mestier a de guerredon,
Qui ains ne fina de servir.
Et g’i ai si m’entencion
Qu’il m’en convient mon bien haïr
Por ce je tieng à desraison
De tous jors proier sans joïr.
Moins aim tel vie que morir:
Qu’à son vivans ne puis faillir.
Si en ai loiale ocheson.
Bien deust ma Dame esgarder
A ce que j’ai .v. ans proié.
Sé je li voussisse fausser,
Piece a je l’eusse laissié:
Mais tant l’ai de fin cuer amé!
Ne ja dou cors n’aura pitié?
Espoir je l’ fais sans son congié!
Mais griès seroit à retorner
D’amors, puis qu’on l’a commandé.
Onques tant ne me seus garder
Que plus n’aie amé que proié,
Et sans trichier, et sans fausser.
L’Amor, qui tel sens m’a laissié,
Se les douces paines d’amer
Ne mi toit, bien iert sans pitié:
Ne miels doinst ma Dame congié
Dou felon penser retorner,
Qu’elle a por m’amor comencié.
