Tant ai Amors servie et honorée (45)

Tant ai Amors servie et honorée (45)

Tant ai Amors servie et honorée ,
Bien me deust mon servise mérir.
Mais ma poine n’iert mais guerredonnée;
Qu’à moy ne peut joie d’amors venir.
Hé Deus! coment me poroie esjoïr,
Quant j’ aloigne la rien, qui plus m’agrée!

Se li miens cors se part de sa contrée,
Ne s’en veult pas por ce li cuers partir.
J’en pars mon cors; mais g’i lais ma pensée.
Qui près aime, de loins ne puet haïr.
Ne près ne loins ne puet vrais cuers haïr;
Ne ja Amors n’iert de mon cuer sevrée.

Celle est et belle, et bone, et bien sénée.
S’elle à s’amor me daignoit consentir,
Adonc serait ma dolor obliée.
Je l’amerai, s’en devoie morir;
Car plus me plaist por li amer languir,
Que por autre fust ma dolor sanée.

En pouc d’eure fut bien ma mort jurée;
Sans moy avant défier ne garnir,
Sui eul riant, sa face colorée,
Son biaus parler, qui tant plaist à oïr,
Me sorent si décevoir et traïr
Qu’encontre eus tous n’a ma raison durée.

Toute biauté s’est en li aùnée:
Souffraite en ot Deus en moy enbellir.
Et quant biautés est toute à li donée,
Deus, qui me fist à la biauté faillir,
Me ra doné vrai cuer por li servir,
S’il vos plaisoit, douce Dame honorée.