Savez por quoi Amors a non amors (40)

Savez por quoi Amors a non amors (40)

Qui sait pourquoi Amors a non Amors ?
Qu’il ne griève fors les siens seulement.
Qui le saura, s’en dise son talent:
Car je ne l’ sai: sé Diex me doint secours,
Amours semble diable, qui maistrie:
Engigne plus celui, qu’en lui se fie.
Ce poise moi, (sé j’aie ja merci),
Plus que pour moi, cent mile tans pour li
Que on la puet rester de félonie,

Je suis tout siens ; et s’en sens la doulours.
Et me poise de son mal durement;
Et en son bien cuid mon avancement.
Car de servir vient-il bien à plusours.
Et cil sert bien son seigneur, qui l’chastie,
Et qui li pois, quant il fait vilenie.
Mais Amors n’a cure de tel chasti;
Car ele i a tant veu et oï,
Que ne li chaut de riens, que on li die.

Amors m’a fait tante fois correcier,
Qu’en mon courrous n’a mes point de pooir.
Ains suis plus siens, quant plus me désespoir,
Aussi com cil, qui delès le foier
Gist malade et ne se puet deffendre ,
Et menace la gent parmi à fendre.
Aussi dis-je ce pour moi desenfler :
Il fait grant bien, quand on en os parler.
Mieus en peut on l’assaut d’Amours atendre.

Se je m’en dueil, ne fait à mervillier;
Car Diex la fist por gens faire doloir.
Là où Amours la m’amena veoir,
Je fus adès en un dous atachier,
Qu’elle me fist de sa blanche main tendre,
Quant par sa main me prist à salut rendre.
Miex aim-g’ la main, dont me volt adeser,
Que l’autre corps, où ce me fait penser:
Car du confort sait ele assez rendre.

Qui set aimer, il sauroit bien haïr,
Se il voloit, plus que nuz autres homs.
Mais n’est pour ce loiauté ne raisons,
Qui bien aime, qu’il en doie partir.
Ains doit chascuns garder sa renomée.
Et se Amours esloit bien apensée,
Elle donroit à fin ami loial
Joie et secours sans avoir trop grant mal.
Ainsi seroit servie et honourée.

Dame, merci! la miex embalsamée,
Que nuit et jour vois cent fois d’un estal,
Me fait de vos parler si à cheval
Qu’il m’est avis que merci ai trouvée.