S’onques nuls hem por dure départie (44)
S’onques nuls hem por dure départie (44)
S’onques nuls hem por dure départie
Peut estre saus , ja serai par raison.
Torterelle , qui pert son compagnon ,
Ne fut onques de moi plus esbahie.
Chascuns pleure sa terre et son pais ,
Quant il se part de ses coraus amis:
Mais il n’est nuls congiés, quoi que nuls die,
Tant dolorous com d’ami et d’amie.
Li reveoir m’a mis en la folie,
Dont je m’esloie gardés longue saison.
De li veoir ai quise l’achoison,
Dont je morrai : et se je vif ma vie,
Verra bien mort près cil, qui a apris
Estre envoisié et chantant et jolis ,
Vault assez pis, quant sa joie est fenie,
Que s’il moroit tout à une foïe.
Douce Dame, tout tems fors de béance
De vos m’estuet partir sans recovrer.
Tant en ai fait, que ne l’puis mais laissier:
Et se ne fust de demorer viltance
Et reprochiers, j’alasse demander
As fins amans congié de demorer:
Mais vos estes, Dame, de tel vaillance
Que vostre amis ne doit faire faillance.
Sé je seusse à tant à la creux prendre
Que le congié me tormentast ainsi,
Je meisse ma vie en vo merci:
S’alasse à Dieu grâces et merci rendre
De ce qu’onques ne li desservi jor,
Que je fusse béans à vostre amor.
Mais je me tieng apaiés de l’atandre,
Puisque chascun vous aime sans mesprandre.
