Qui plus aim, plus endure (39)

Qui plus aim, plus endure (39) (34)

Il soupe des rigeurs et les mépris de sa maîtresse, qui rit de ses maux. il l’a vue en songe ; pourquoi ce songe n’a-t-il pas durée toute sa vis .

 

Qui plus aim, plus endure,
Plus a mestier de confort;
Qu’amors est de tel nature
Que son ami mène à mort.
Plus en a joie et déport,
S’il est de bone aventure.
Hélas ! ce ne puis point avoir!
Ains m’a mis en non chaloir
Cele, qui n’a de moi cure.

Onques riens ne fu si dure
D’aymant, comme je recors
Des soupirs, et de l’ardure,
Et des larmes que je port.
Sui navrés par la plus fort
Et mis à déconfiture:
Mes je n’ai vers li pooir.
El rit, quant me voit doloir!
Ci faut pitiés et mesure.

Puis que pitiés m’est faillie,
Je m’en devroie bien partir,
Mes sens m’en semont et prie;
Mais mes cuers ne veut soffrir.
Ains me fet por li servir,
Tant aime sa seignorie.
Dame, une riens vous demant,
Que vous jugiez, qui se rent,
Sé il a mort desservie.

Par maintes fois l’ai sentie
En dormant tout à loisir:
Quant pechié et envie
M’esveilloit, et que sentir
La cuidoie à mon plaisir,
Et ele n’i étoie mie,
Lors plouroie tendrement:
Et bien vousisse en dormant
Avoir li tote ma vie.

Ma grans joie est tormentière
Si grans que ne puis conter.
En veillant ne voi manière
De mes dolors conforter.
Bien me deust bestourner
Amors de ce devant derrière:
Li dormir fust en oubli,
Et j’eusse en veillant li;
Lors seroit ma joie entière.

Quand li voil crier merci,
Lors ai tel pavor de li,
Que n’os dire ma proière.
Raoul, Turc ne Arabi
N’ont riens du vostre saisi:
Revenés par tans arrière.