Puisqu’il m’estuet de ma doleur chanter (37)
Puisqu’il m’estuet de ma doleur chanter (37)
Puisqu’il m’estuet de ma doleur chanter
Et en chantant dire ma mesestance,
On ne doit pas en mon chant demander
Qu’il y ait envoiseure.
Ains chant selon l’aventure ,
Com cil, qui ne puist merci trouver,
Et qui en soi n’a mès point de fiance.
Sui com Echo, qui sert de recorder
Ce qu’autre dit: et par sa sorcuidance
Ne la daigna Narcissus regarder.
Ains sécha toute d’ardure ,
Fors la vois, qui encor dure.
Ensi perdrai tout fors merci crier:
Ains sécherai de duel et de pesance.
Douce Dame, qui me poez doner
Sor toutes riens de mes maus alejance ,
Se me lessiez morir por bien amer,
Vostre en iert la mespresure.
Merci, franche créature!
A la mort sui : je n’en puis eschaper,
Se loiauté ou pitié ne m’avance.
Mès l’Amor, qui Narcissus lit mirer,
Quant por Echo en vout prendre venjance,
S’ensi por moi li fesoit à amer
Tel, qui de li n’eust cure ,
Nul n’auroit à sa droiture
Le grant orguel, qui la fet réveler:
Si en viendrait plus tosl à repentance.
Las! qu’ai je dit? qui porroit assembler
Tant en son cuer d’orgueil et de bobance
Qu’il li osast li ne s’amor véer ,
Tant soit de flebe nature?
Quel siècle a créature,
Qui de biauté la puist ressembler,
Ne qui valors en traisit en vallance?
Peintre et maçon, qui bien sevent ouvrer.
Et trestout cil, qui sevent d’ingromance,
I porroient tousjours lor tens user
En œuvre et en portraiture,
Ains que il feist la figure,
Qui de biauté la puist ressambler
De cuer, de cors, de vis , et de samblance.
